К1ант, хьомениг... цхьаьна дийнахь ша хьуна гур ю къанъелла, леларехь хат1доцуш. Аса доьху хьоьга сайн т1алам бар цу хенахь, собар гулдар хьайгахь-соьх кхетархьамма.
Г1ор доцучу куьйгашкара юург сан дагт1е эгайоьлча, бедар, сайгга, т1еюха ца луш йисича со, дагадаийта денош, ша хьо тахана шега ца далург дан 1амор. Собаре а волуш, сайга хьажар доьху, хьоьга.
Нагахь соьгара ца товш йог1уш хьожу хилахь, дов ма делахь суна, дагадаийталахь ша хьайна бедарш т1еюхар а, хьо ц1ена хилийта ша лелийнарг а.
Хьекъална эшна, да ца дог1ург деш хилахь со, ма велалахь соьх. Сан хьекъал а, б1аьргаш а хилий, г1о деш, х1отталахь д1а.
Да дезарг а, дита дезарг а ахьа муха 1амор ду суна, ша ма кхиийна хьо, кху дуьненчохь долу дахар а довзуьйтуш?!
Вайша вовшашка дистхуьлуш, к1ад ма лолахь, аса меллаша, текхна къамел дарх а, ойла т1ехьаюсуш, хьекъал артделла хиларх а со. Тахана сан ирс хьоьца юххехь, вайша цхьаьна къамел деш хилар ма ду.
Когашкара г1ор д1а а даьлла, йолаяла хало суна т1ех1оьттича, хилалахь соьца к1еда-мерза. Аса ма дукха лелийра хьо: везаш, хьоме хеташ, куьг а лаьцна-хьуна хьайнна, волавала 1аммалц. Хьуна эхь хета мегар дац сан куьг лаца тахана, кхана хьо а ма ву, хьайн куьг лаца цаъ оьшурволчу хьолт1е кхочурволуш.
Хаалахь, яц со, жима а йолуш, дахарна дуьхьалйоьдуш, хьо санна. Дахарх херлуш, йоьду ша яларна герга, иза, кхерам боцуш, т1еэца кийча а йолуш. Цундела, хилахь соьца-суна юххехь.
Нагахь ахьа соьгара дийлина г1алаташ дагалецахь, хаалахь, сан дагна, даъиманна а, хьуна хила лиънарг -диканиг бен ца хиллий.
Тешалахь, уггаре а диканиг, хьоьгара оьшург цу хенахь: сан кхачабацаршна гечдар а, ледарлонаш къайлаяхар а ду. Деле хьуна гечдар а, хьан ледарлонаш къайлаяхар а доьху аса.
Хьан велакъажаро а, веларо а, х1инца а, хазахетар кхуллу шен кийрахь, хьалха санна. Ма хьегаелахь со хьайх-соьх д1а а къасте. Со хьоьца яра, хьо винчу хенахь, хилалахь суна юххехь, со кхелхича.
Х1ара весет дешийла х1ораммо а - ненан ойла а, цуьнан дагахь дерг а довза. Д1а а лой, дешийта х1ара шайн доьзалшка.
Дала гечдойла вайн кхелхинчу дайшна, наношна! Уьш дийна белахь- бахийла могуш а, маьрша а!
Гочдинарг ву Ахьмад